Електронската пријава студентот треба да ја испрати до студентскиот дом преку интернет-страницата на Министерството за образование и наука, www.mon.gov.mk.

Пријавувањето за студентско легло преку интернет се воведува првпат. Изминатите години студентите ги носеа пријавите директно во домовите, при што се создаваа невидени турканици и метеж. Речиси секоја година има голем број поплаки од кандидатите, кои обвинуваат за распределба на леглата според партиска припадност, за манипулации со напумпани бодови и фалсификувани потписи.

Од Министерството за образование објаснуваат дека токму од тие причини одлучиле годинава пријавувањето да се врши исклучиво по електронски пат.

- Така ќе се избегнат сите неправилности при пријавувањето. Свесни сме дека изминатите години имаше многу поплаки на конкурсот, но со електронското пријавување тие ќе се сведат на минимум - велат во ресорното министерство.

Пријавувањата за место во дом за студентите од втора година па нагоре ќе почнат од 25 јули и ќе траат до 15 август. Рокот за пријавување на бруцошите ќе почне на 10 септември и ќе трае десет дена. Студентите во Скопје ќе конкурираат за 4.670 легла во неколкуте домови. Во студентскиот дом во Охрид ќе се тркаат за 211 слободни места, во Штип за 112, во Прилеп за 354, а во Битола за 370.